Дзе пачынаюцца сцежкі?..

“У навуцы няма сталбавой дарогі,
і толькі той дасягае яе зіхоткіх вяршынь,
хто нястомна ўзбіраецца па яе камяністых сцежках…”

Наталля Чуйко, васьмікласніца гімназіі №1 г.Дзяржынска, прыняла ўдзел у Міжнароднай маладзёжнай навукова-практычнай канферэнцыі “Навуковыя памкненні-2011”, што прайшла ў Мінску ў Нацыянальнай Акадэміі навук у рамках беларускага інавацыйнага тыдня пры падтрымцы Лабараторыі Інтэлекту – міжнароднага грамадскага аб’яднання, якое займаецца выяўленнем навуковых талентаў сярод моладзі.

Канферэнцыя ўяўляла сабой комплекс мерапрыемстваў і доўжылася цэлы тыдзень.Яе арганізатары паклапаціліся аб тым, каб кожны дзень быў насычаны падзеямі, карыснымі ў плане інтэлектуальнага развіцця, запамінальнымі. Лекцыі, трэнінгі, майстар-класы ўзнімалі праблемы лідэрства і прадпрымальніцтва, садзейнічалі абуджэнню прадуктыўнай навуковай думкі. Акрамя таго, прапаноўвалася багатая экскурсійная праграма.

Канферэнцыя прадугледжвала работу секцый на трох узроўнях – у адпаведнасці з узроставымі катэгорыямі ўдзельнікаў: маладыя вучоныя, студэнты, сатэліты (навучэнцы). Наталля Чуйко – самая юная удзельніца форуму маладых навукоўцаў. Яе работа адзначана дыпломам трэцяй ступені ў секцыі “Гуманітарныя навукі”.

А пачыналася ўсё два гады назад… Яе ўвагу прыцягнулі незвычайныя па форме і змесце літаратурныя творы – акравершы. Стала адшукваць іх у паэтычных кнігах, альманахах, у перыёдыцы. Такім чынам, атрымалася своеасаблівая энцыклапедыя беларускага акраверша.Настаўніца беларускай мовы і літаратуры Алена Чаславаўна Сяліцкая дапамагла правесці іх сістэматызацыю і прапанавала даследаваць вобразныя сродкі, мастацкія вартасці сабраных твораў, асаблівасці жанру. Вось так і нараджалася навуковая праца “Акраверш у беларускай літаратуры”.

Абаранялася работа на роднай мове, але статус міжнароднай канферэнцыі патрабаваў і яе прадстаўлення на мове міжнародных зносін. Таму навуковы артыкул быў напісаны па-англійску, так, дарэчы, была аформлена і стэндавая прэзентацыя. Навуковы артыкул увойдзе ў зборнік матэрыялаў канферэнцыі, які пабачыць свет напрыканцы студзеня.

Уражаннямі аб канферэнцыі дзеліцца А.Ч.Сяліцкая, якая была побач са сваёй вучаніцай і раздзяліла з ёй мінуту славы:

“Адкрыццё і закрыццё канферэнцыі было не паасобку для розных катэгорый удзельнікаў. І таму адчувалася ўласная далучанасць да свету навуковых адкрыццяў. Усведамленне, што вось нарэшце і твой голас (у прамым і пераносным сэнсе) прагучаў з высокай кафедры пад зводамі шыкоўнай залы Нацыянальнай Акадэміі навук, прыдавала значнасці падзеі ў асабістым лёсе, у сціплай (хочацца верыць, пакуль) біяграфіі. Наташа атрымала сертыфікат удзельніка канферэнцыі і хутка патрымае ў руках сертыфікат аб навуковай публікацыі (ужо другі ў яе жыцці). Навуковаму артыкулу Н. Чуйко быў прысвоены індывідуальны лічбавы і аўтарскі код – а значыць, ён увайшоў у скарбонку беларускага літаратуразнаўства і ўключаны ў рэестр навуковых прац маладых вучоных. Дыплом трэцяй ступені – першая Наташына ўзнагарода міжнароднага ўзроўню.Я ганаруся сваёй вучаніцай і жадаю ёй новых поспехаў і дасягненняў”.

Застаецца толькі дадаць, што імя гімназісткі з Дхяржынска занесена ў банк дадзеных “Адораная моладзь Беларусі”, яна стала стыпендыятам спецыяльнага фонду Прэзідэнта Рэспублікі Беларусь па падтрымцы адоранай моладзі.

Дзе бяруць пачатак жыццёвыя сцежкі?.. Ад школьнага стала… Ад школьнага званка…Ад школьнага ўрока…І заўсёды ў першую чаргу – ад сябе…

Газета "Узвышшы"